पंतप्रधानांकडून अंजनाबाईंच्या आरोग्यसेवेला शाबासकी

‘हर घर पोषण आहार, त्योहार’ अंतर्गत मंगळवारी (दि. ११) पंतप्रधान नरेंद्र मोदी यांनी देशभरातील अंगणवाडी सेविका, आशा कर्मचारी आणि आरोग्यसेविका यांच्याशी व्हिडीओ कॉन्फरन्सिंगद्वारे संवाद साधला. यामध्ये राज्यातील सर्वाधिक कुपोषणग्रस्त भागापैकी एक आदिवासीबहूल नंदुरबार जिल्ह्यातील आरोग्यसेविका अंजना परमार यांच्या सेवेला पंतप्रधानांनी शाबासकी देत दुर्गम भागातील तरंगत्या दवाखान्याचे कौतुक केले.
प्रधानमंत्री नरेंद्र मोदी यांनी मंगळवारी देशभरातील अंगणवाडी सेविका, आशा कर्मचारी आणि आरोग्य सेविका यांच्याशी व्हिडीओ, कॉन्फरन्सिंगद्वारे संवाद साधला. या वेळी नंदुरबार महिला कर्मचाऱ्यांचा त्यात समावेश होता. यामध्ये पंतप्रधान नरेंद्र मोदी यांनी सुरुवातीला मराठीतून ‘आपण कसे आहात आणि गणपती उत्सवाची तयारी कशी सुरू आहे’ याची विचारणा केली. नंदुरबार येथील प्रसिद्ध चौधरींचा चहा घेण्यासाठी आपण नंदुरबार यायचो, याचा उल्लेख करीत त्यांनी नंदुरबारमधल्या आठवणींना उजाळा दिला.

यावेळी आरोग्य सेविका अंजना परमार यांनी पंतप्रधानांना संवाद साधतांना, नंदुरबार जिल्हा हा मध्य प्रदेश व गुजरात राज्याच्या सीमेवर असून, या भागातून नर्मदा सरोवर प्रकल्प असून पहाडी भाग असल्यामुळे मोठ्या प्रमाणात आदिवासी लोक पाड्यात राहतात. अशा लोकांना पावसाच्या दिवसांत आरोग्याची सुविधा देताना अडचणी निर्माण होतात. जून ते ऑक्टोबर महिन्यात या परिसरात एकूण ३३ गावांसह ६५ पाड्यांवर राहणाऱ्या सोळा हजार लोकांना आरोग्याची सुविधा उपलब्ध करण्याबाबत प्रयत्न केला जात असल्याचे परमार म्हणाल्या. दररोज दोन ते तीन किलोमीटरची पायपीट करणाऱ्या या महिला कर्मचाऱ्यांचे मोदींजींनी अभिनंदन केले. पंतप्रधान मोदी यांनी सातपुडा पर्वत रांगातील अंधश्रद्धेचे जाळे दूर करत आधुनिक विज्ञान घरोघरी पोहचवणाऱ्या आरोग्य यंत्रणेतील महिला कर्मचाऱ्यांच्या कामाला शाबासकीची पावती दिली.

असे कार्य करतो तरंगता दवाखाना
सरदार सरोवरच्या परिसरातील ३३ गावे व ६५ पाड्यांसाठी आरोग्य विभागातर्फे तीन जलतरंग दवाखान्याच्या माध्यमातून आरोग्याच्या सुविधा उपलब्ध करून देतात. आरोग्य सुविधा देण्यासाठी एक बोटीला १० गावांचा कार्यक्रम निश्चित करून देण्यात येतो. या बोटीवरील कर्मचारी पाच दिवस नर्मदा सरोवरातील गावांना आरोग्य सुविधा पुरवितात. गेल्या पाच महिन्यांत तरंगता दवाखान्याच्या माध्यमातून ६१० लहान मुले, १३ हजार ३८३ बाह्यरुग्णांवर उपचार करण्यात आले असून, लहान मुलांना लसीकरणही करण्यात आले, अशी माहिती यावेळी देण्यात आली.